Nossa historia
1962/63 emprem giug amicabel a Glion
Davos da sen.: Jakob Beer, Ciril Lombriser, Erwin Beer, Adolf Decurtins, Carli Albin, Giusep Decurtins, Jörg Guldimann, Serafin Vinzens
Davon da sen.: Guido Sgier, Arnold Tomaschett, Felici Soliva, Richard "Atti" Vinzens, Reto Reichenbach, Richard Weber, Martin Mirer
(extract ord il cudisch «50 onns Uniun da scursalets Trun»)
A Trun e secapescha era en auters loghens dalla Cadi mav'ins cun scursalets ni patinas ditg avon ch'ei ha dau clubs da hockey en quella regiun. Pli baul sedivertevan ils affons patinond per las vias entuorn sin scursalets ch'ins fermava vid ils calzers e ch'ils scolars runavan magari tochen en scola. Cul temps ein ils scursalets untgi dallas vias sin puozs e laghets schelai. Naturalmein ch'ils buobs han prest entschiet a giugar sin quellas surfatschas neidias cun festa crutscha ni cannas ed in bal ni in tschep, pia gia ina sort da hockey sin glatsch. E naturalmein che quels giuvens amaturs dil hockey semiavan da saver imitar ils campiuns da Tavau ed Arosa.
Il giavisch dad haver in agen glatsch seregheglia plaunsiu. L'idea da far glatsch a Trun nescha igl onn 1961. Cunquei ch'ei existeva aunc negin'uniun specifica pil sport da glatsch, instradeschan zacons interessents a caschun dalla radunonza generala dalla cumpignia da mats dils 29 da december 1961 ina discussiun davart ina plazza da glatsch e la radunonza decida d'inoltrar alla vischnaunca ina damonda corrispundenta. Suenter la risposta positiva dalla suprastonza communala prendan zacons iniziants las hottas enta maun e preparan la fundaziun dall'Uniun da scursalets Trun (UdsT).
Ils 10 da zercladur 1962 ha la radunonza da fundaziun liug el Hotel Casa Tödi. 22 interessents - oravontut giuvens - fan part da quella impurtonta sentupada. Las statutas vegnan approbadas e l'emprema suprastonza elegida. President: Giusep Decurtins, actuar: Carli Albin, cassier: Thomas Decurtins e sco revisurs da quen: Balz Rageth e Placi Soliva.
Vul Ti saver dapli da nossa historia? Dai ina egliada en nos cudischs edi a caschun dils giubileums da 25 respectiv 50 onns.